المبكبكه الليبي على اصولها وبالخطوات والصور
النهارده جايبالكم اكله شهيه اوى وفى حله واحده
المكونات : مكرونة صغيرة ، كيلو لحم ضاني( لازم ضاني )، كوبايتين عصير طماطم ، معلقتين كبار صلصة ، بصلة مفرومة (اختياري) ، فلفل شطة ، بابريكا ، ملح ، فصين مستكة ، معلقتين زيت زيتون ( ماينفعش اي زيت)
الطريقة
سخني الزيت ف حلة الطبخ وضيفي المستكة ثانيتين وبعدين اللحمة وقلبي لغاية ماتبطل تلزق وتاخود الصدمة ، ضيفي البصل لو عاوزة بصل وقلبي تقليبتين ووطي النار لغاية ماللحمة تنزل ميتها بعد كده انزلي عليها بعصير الطماطم والصلصة والفلفل شطة وسيبيها تغلي لغاية ماتتسبك وبعدين حطي مياة كتير بقي قد سليق اللحمة وسيبيها تتسلق
اول ماتحسي ان اللحمة استوت خودي شوية من الشوربة الحمرا دي ف طبق علي جنب (حاقولك ليه بعدين) 😉 زودي مية تاني قد كباية كده او اكتر حسب مقدار المكرونة اللي عاوزاها ويغلوا غلوة وبعدين ضيفي الملح والبابريكا والمكرونة (كده المكرونة حتتسلق ف شوربة اللحمة)
كده خلصنا ... اغرفيها سخنة لازم
ملحوظة المبكبكة بتبقي سايلة زي الصورة ، ولازم تتاكل سخنة لانها لو بردت بتقفش ، ييجي هنا دور شوية الشوربة الحمرا المركزين اللي خبيناهم فوق دول 😂 بتستخدميهم لو حبيتي تسخني المكرونة بأنك تزوديهم شوية مية وملح لاننا اخدناهم قبل التحديق ، ركزي 😉 وتحطيهم عالمكرونة وتسخني وتاكلي بالهنا والشفا ، وابقي قابليني لو حاجة فضلت للتسخين اصلا 😁 بالهنا والشفا وادعولي
تعليقات
إرسال تعليق