كيك اليوسفى الشهى جدا بطريقه ناجحه وسهله جدا وفى دقايق
النهارده جايبالكم احلى كيكه يوسفى بمناسبه الشتا ..
فى الخلاط واحدتين يوستفاندى بقشرهم مقسومين نصين ووقعنا البذر بصنعة لطافة كده ومعاهم كوبين مية وكوب ونص سكر ونضربهم ضربا مبرحا وننزل عليهم باربع بيضات وكيس فانيليا ونضرب تانى ضربة محترمة ونضيف كوب زيت عباد .بعد كده نجيب طبق غويط وننزل فيه ب تلات كوبايات دقيق وعليهم كيس كيك شيف ورشة ملح ونقلب المكونات الجافة وننزل بالخليط اللى ضربناه فى الخلاط ونقلب بمعلقة خشب.
نجيب القوالب والصينية وندهنهم زيت ونصب الخليط الكيك ونوزعه ع القوالب وطبعا الفرن شغال من اول ما بدأنا وقولنا بسم الله.
هندخل القوالب الفرن على درجة حرارة عالية لمده عشر دقايق وبعدها نخلى النار وسط لمده تلت او نص ساعة حسب فرنكم وتطلع تبرد خالص وبعدين نقطعها وبالهنا والشفا يارب تعجبكم
تعليقات
إرسال تعليق