فطير مشلتت بيتى حكايه وبيدوب فى البق وبالصور
النهارده جايبالكم اجمد وصفه للفطير المشلتت ..
الفطير المشلتت
حاجه كده سهله جداً وحلو جداً
ومش مكلف زي ما كتير بيفتكر
واكيد الكل بيضعف قدامه مهما كان عامل دايت
نقول بقى 👇🏼
اولاً الفطير الحلو بيتعمل فى صنية كبيرة ويستحسن الصواني اللي مخصصه ليه .. لو مافيش يبقى أي صنية بس تكون كبيرة
هنجيب
١ك دقيق عادى 🍚
معلقة ملح 🧂
معلقتين سكر 🥄🥄
ماء عادى بدرجة حرارة الغرفه 🍶
ونعجن العجينة كويس لحد ماتلم معانا ونحس انها سهلة التشكيل ونعجنها تانى لمدة 5 دقائق تقريبا لما تتعجن كويس حتسيب من ايدك مش هتلزق فيها .. ونغطيها ونسبها شوية ربع ساعة مثلاً ...
الخطوة التانية
نجيب نصف ك ذبده نحطه على نار هادية لحد ما يسيل ... نقطع العجينه 10 قطع وندهن الصنيه بالذبده وندهن الرخامة
نفرد القطعة الاولى ونرش عليها ذبده ونلمها على بعضها ونحطها في الصنية ونفرد القطعه الثانية ونرش فيها ملعقتين ذبدة ونجيب اللى فى الصنية نحطها فى الوسط ونلمها عليها ونحطها فى الصنية
ونفرد القطعة الثالثه ونجيب اللى فى الصنية ونضعها فى الوسط ونلمها عليها وهكذا لحد ما ننتهى من العجين كله ..نترك الفطيرة بعد كده لمدة نصف ساعه او اكثر شويه ونكون مشغلين الفرن من نصف ساعة .. وبعدين نفرد الفطيره نخليها تملاء الصنية بالتساوى بالضغط عليها برفق ونرش على الوجه ذبده ولو قشطه بيكون افضل بكتير (ممكن كمان نضيف قشطة بين رقائق الفطير) وندخلها الفرن بتاخد سوى حوالي ربع أو ثلث ساعة لو احمرت من الاحرف نعرف انها استوت من تحت وممكن نرفعها فوق علشان الوش يببقى ذهبى جميل
الفطير يتاكل مع حادق بجبنة قديمة ومش مثلاً أو يتاكل مع حلو بعسل نحل او عسل اسود وطحينة وفي كل حلاته بيكون ممتع جداً في اكله 😍😍😍
جربوه وقولولي رايكم ولو في اي سؤال انا معاكم 💕
تعليقات
إرسال تعليق