عمايل ايدى: الدجاج البروست بالتفصيل حلوه اوى واحلى من بتاعت بره وبالصور
النهارده جايبالكم وصفه كتير سألونى عليها يارب تعجبكم ..
الفراخ البروست اللى محيرة ناس كتير وكل واحد وله طريقه انا هقولكم طريقتي اللى اتعلمتها من شيف وطبعا كالعاده احنا الستات البيوت بتحب تضيف من عندها حجات
هنجيب فرخه ونقطعها ٨ قطع الشيف والمحلات بيشتغل في الفراخ من غير سلق بس احنا ستات البيوت بتحب الاكل يكون صحي جدا ومستوي جدا عشان ولادنا احنا هنسلقها نص سلقه بالظبط ربع ساعه عشان متقطعه هنحط في مية السلق بتاعتها كاري وفلفل اسمر وملح وبابريكا وزنجبيل وقرفه ورق لوري وفص حبهان الحجات دي هتديكي طعم مميز.. بعد سلق الفراخ نص سلقه نطلعهم من الشوربه ونركنها على جنب هنجيب بقى طبق فيه كوبايتبن دقيق ونحط على الدقيق ملح وفلفل وتوابل فراخ من العطار اسمها توابل فراخ وبصل وتوم بودر وكاري وزنجبيل كل ده على الدقيق طبعا ربع معلقه صغيرة من كل حاجه او على حسب رغبتك.. اقسمي الدقيق بالتوابل ده على طبقين نص الدقيق حطي عليه معلقتين كبيرة نشا واقلبيهم كويس وحطيهم في علبه بلاستيك بغطا .. والنص التانى حطى عليه نص معلقه صغيره بيكنج بودر وهاتى بقى ميه وبالمضرب اليدوي دوبي نص الدقيق اللي عليه البيكنج بودر اعمليه عجينه زي عجينة القرنبيط كده عايزه تحطى الفراخ فيها فترة عادي مفيش مشكله انا عموما بشتغل على طول ..شغلى الطاسه بتاعتك فيها زيت غزير وهاتى قطعة الفراخ نزليها في التتبيلة غطيها خالص وطلعيها من التتبيله حطيها في العلبه البلاستيك اللى فيها دقيق وبغطا وغطى العلبه ورجيها كويس عشان الفراخ تتغطا وتعمل شكل من بره زي شكل بروست المحلات بالظبط وشليها براحه من العلبه بمعلقه نزليها الطاسه وغطي الطاسه عشان البخار يخليها تكمل سوا ولما تقلبيها على الجنب التانى متغطيش الطاسه بقى والف هنا جربوها هتعجبكم اوي ..
تعليقات
إرسال تعليق