الزلابيا المقرمشه باسهل طريقه وبالصور العوامات

السلام عليكم ..
النهارده جايبالكم اسهل طريقه لعمل الزلابيا او العوامات ..
كوبين دقيق
معلقة كبيره سكر
معلقة كبيره خميرة
معلقة كبيره نشا
نصف معلقة صغيره بيكنج بدر
رشه ملح
حطي كل المقادير علي بعض بس من فوق خالص السكر والخميرة وابتدأ اعجني بماء دافئ حوالي كوب ميه دافيه أو تزيد بسيط المهم متبقاش سايله علشان تظبط وبعدين افضلي لتي واعجني فيها  3دقاءق كده
وبعدين غطيها وسيبيها تخمر ساعه وبعدين هاتي كيس نايلون لابسيها في كوب وانزلي جواه بالعجينه واربطي الكيس تكوني مجهزه زيت سخن وتوطي عليه لغاية ماتخلصي تقطيع هتخرمي الكيس وتبدي تدوسي عليه وتقضي في المقص متمليش الطاسه ومتخلهمش يلزقوا في بعض بعد التقطيع علي النار وأفضل قلبي فيها تاخد اللون الدهب تخرج بأية علي شربات بارد تقيل وبالف هنا

اكوبين سكر عليهم كوب ونصف مياه يغلوا تنزلي بعصره ليمون وتوطي يفضل يغلي لغاية مايتقل
في تكه حبيبتي لتدويرها اول شئ أن ميتها متكونش كتير لازم تبقي مظبوطه لأن لو ميتها كترت بتخلي الزلابية تقلب لكاءن اخر
تاني حاجه لاحظتها
أن الكيس لازم يتقص بمقص وتكون الحته المقصوصه منه صغيره مش كبيره
وعلي فكرة مش لازم نقص الزلابية نفسها بالمقص واحنا بنزلها في الزيت
انا بقص الكيس بس بالمقص حته صغيره
وبعدين بدوس بالكيس وأنزل بأيدي في الزيت علي طول بس أيدي ببقي بلها زيت وبعدها عن الزيت شويه لأنه حامي
والله أفضل بكتير من عذاب المقص
متخليش الزلابية تخمر عن الوقت المعتاد لها لأن تخميرها زياده بيخليها تسيل يعني مينفعشي تعملي العجينة وتشيليها في التلاجه الأفضل بعد ماتخمر تتعمل علي طول
وبعدين متغطيش الزلابية بعد ماتخلص لانها بكده هتطري
خليها معرضه للهوى لأن بيحافظ علي القرمشه بتاعتها