تكات الكشرى اللى هتخلى الكشرى زى بتاع بره واحلى

السلام عليكم ..

مين فينا مبيحبش ياكل الكشرى من بره علشان طعمه وريحته الجميله ..
النهارده جايبالك تكات الكشرى المصرى من جوه المحلات ..
يلا نبدا
هنحمر الشعيرية لوحدها ولازم الزيت يكون سخن جداً مع التقليب المستمر.
هنحمر البصل ف نفس الزيت بتاع الشعيريه والبصل يكون متقطع شرائح رفيعه اوى ونحطه ف مصفه ونرش عليها شوية ملح ونستني لحد ما تنزل ميتها وبعدين رشه دقيق او نشا ونقلبها كويس والزيت يكون سخن وننزل بيهم ف الزيت.
ملحوظه:- الزيت يكون كتير جداً لان هنسخدمه في الطبخه كلها..
هنجيب اصغر مكرونه من افضل نوع احنا بنفضله وتتسلق عادي مع رشة ملح مع شوية مكرونه اسباغيتي تتحط قبلها بشوية 4 دقايق مثلاً وتتغسل بميه سخنه ونكون مجهزين شوية زيت بطشه ثوم بسيط ونقلبها بيها.
  هنسخن ميه اول ما تبدأ تغلي هننزل بشويه عدس اصفر حوالي معلقة لكل كوبايه رز بعد ما يستوي الرز عادي جداً هنرش عليه ربع معلقه قرفه وزيها زنجبيل ونص معلقه كمون (معالق كبيرة) ونفس طشه الثوم اللى اتعملت للمكرونه نعملها للرز ونضيف له الشعيرية ويفضل انها تكون كتيرة ويتقلب كويس ورشة ميه صغيرة ويتقفل عليه علشان الشعيرية تبقي طرية.
  العدس حوالي ربع كيلو هننقعه في ميه عاديه لمده 10 او 15 دقيقة بعد كده ننزل به ف ميه مغليه وبعد ما يستوي نحطه ف مصفى وبعد ما يتصفى خالص نحطه ف حله علي نار هاديه جداً زي الشمعه ونقلب فيه بأستمرار علشان ميتحرقش ونحط عليه معلقه كمون ونحاول نهرس فيه بالمعلقه وبعدين اطلعه للهوا يتهوي.
سادساً:- الصلصة بقي من اهم الخطوات لاكتمال طبق الكشري اول حاجه هنضحي بثمن الطماطم الغالي وهنجيب مثلا 2 كيلو او 3 ونسلقهم في ميه بتغلي فيها فصين ثوم مكسرين وبعد ما تستوي هنقشرها ونضربها ف الخلاط مه الثوم اللى كان معاها ونجيب طاسه كبيرة نحط 5 معالق ثوم مهروس كبار في زيت سخن وبعد ما يتحمروا هنحط عليهم كزبرة ناشفه وكمون معلقه كبيرة من كل حاجه واول ما ريحتهم تطلع ننزل بعصير الطماطم واول ما تغلي ننزل عليهم بشوية بصل من اللى اتحمروا وشوية خل وشوية عصيرليمون ونظبط الملح بتاعها وقبل ما تتسبك خالص نحط شوية قرفه وكمون وكزبرة تانى مع شوية فلفل اسود وتسبيها تتسبك خالص براحتها.. وبألف هنا وشفا

الشطه: هنجيب من زيت اللي اتحمر فيه البصل ونحط 3 معالق شطه كبااااار بس المهم ان الزيت ميبقاش سخن اوي علشان الشطه متتحرقش تحريكه سريعه ف الطاسه ننزل عليها بكوبايه صلصه وكوبايه مية مع عصرة ليمونه.
الدقة : 2 راس ثوم كبار نهرسهم مع 3 قرن فلفل شطه وواحد رومي و3 لمونات عصير هنحطهم ف شوية زيت صغيرن ع النار واول ما انزل بالثوم المهروس مع الفلفل واضيف 3 او 4 معالق خل مركز واحط كزبرة وكمون وملح ونص معلقه شطه نضيف كوبايه مية كبيرة وبغدين تاخد غلوة واسيبها تبرد وكده تبقي جاهزة.