بالصور طريقة عمل الارز بالخلطة والمكسرات

النهاردة جايبالكم طريقة ارز بالخلطه
المكونات :
1/2 كيلو لوز متكسر بالسكينه عشوائي بدون سلق او اى حاجه وبلاش الكبه علشان مينعمش
5 كوب ارز مصري
عدد 2 بصله كبيرة
كبشتين زبيب
توابل الارز بالخلطه من العطار ( وقوليله التوابل الغامقه )
قرفه ، ملح ، زيت ذره
الطريقه :
بنجيب اللوز ونحمره فى مقدار الزيت الى هنسوى فية الرز
ونخلى بالنا كويس لانه مش بياخد وقت وممكن يتحرق بسهوله
نفضل نقلب لحد ما ياخد اللون الذهبى وتشمى ريحته ساعتها تصفيه من الزيت وتفرديه فى صينيه عليها ورق منديل علشان ينشف ويقرمش
ناخد الزيت الى صفيناه من اللوز ونرجعه تانى الحله بتاعت الرز ونحط عليه البصل المفروم ونقلب لحد ما يبقى لونه ذهبى وبعدين نضيف الزبيب ونفضل نقلب لحد ما البصل يحمر والزبيب يتنفخ
نحط مقدار الميه بتاع الرز عادى ونحط الملح الى متعوده عليه والبهارات معلقه كبيره لكل كبايتين رز وزودي معلقه قرفه كبيره كمان علشان اللون والطعم
هنقلب كل التوابل دى والملح فى الميه مع البصل والزبيب ونغطي ونسيبها تغلي
نكون غسلنا الرز كويس ولما الميه تغلى نضيفه ونغطي تانى لحد ما يتشرب
بعد ما يتشرب نقلبه ونوطى النار خالص ونحط الشياطه وكل شويه نقلب علشان كله يستوى
لما يستوي خالص نغرفه في طبق التقديم ونرص عليه اللوز
وبالهنا والشفا